Mkutano huo wa siku tatu unafanyika chini ya uenyekiti wa Kiongozi wa Libya, Kanali Muammar Gaddaffi, mwenyeji wa mkutano huo na Mwenyekiti wa AU kwa sasa, na mada yake kuu itakuwa ni Umuhimu wa Kuwekeza Katika Kilimo kwa Maendeleo ya Uchumi na Usalama wa Chakula.
Huo ni moja ya mikutano miwili ya wakuu hao wa AU ambayo hufanyika kila mwaka kikatiba, na miongoni mwa viongozi waliozungumza kwenye ufunguzi huo ni pamoja na Mwenyekiti wa Tume ya AU, Balozi Jean Ping na Naibu Katibu Mkuu wa Umoja wa Mataifa (UN), Dk. Asha Rose Migiro.
Wengine ni Rais Lula da Silva wa Brazil, Katibu Mkuu wa Umoja wa Nchi za Kiarabu (Arab League), Balozi Amr Moussa, kiongozi wa wafalme wa jadi katika Afrika, Profesa John Nyebela na Mtawala wa Qatar, The Emir of Qatar.
Miongoni mwa viongozi wanaohudhuria Mkutano huo ni Rais Jakaya Mrisho Kikwete, mwenyekiti aliyepita wa AU, ambaye na ujumbe wake aliwasili mjini Sirte usiku wa kuamkia jana, Jumanne, Juni 30, 2009, akitokea Dar Es Salaam.
Ujumbe wa Rais unamshirikisha Mama Salma Kikwete ambaye atahudhuria program maalum ya wake wa viongozi wanaohudhuria Mkutano huo.
Wengine katika ujumbe huo ni Waziri wa Mambo ya Nje na Ushirikiano wa Kimataifa, Bernard Membe na Waziri wa Kilimo, Chakula na Ushirika, Steven Wassira.
Akizungumza kwenye sherehe ya ufunguzi wa Mkutano huo, Balozi Ping ametahadharisha juu ya hatari ya kurejea kwa mapinduzi ya kijeshi na mauaji ya viongozi wa nchi za Bara hili.
“Mauaji ya kisiasa na mapinduzi haramu ya viongozi katika Guinea Bissau, Mauritania na Madagascar yanathibitisha kuwa mchakato wa demokrasia ulioanza katika miaka ya 1990 bado haujapata nguvu za kutosha kuzuia mwenendo huo hasi. Jawabu ya hali hiyo ni kuimarisha utawala wa sheria na kuongeza kasi ya ujenzi wa demokrasia.”
Balozi Ping pia ameonya kuhusu athari zinazolikumba Bara la Afrika kutokana na mtikisiko mkubwa wa hali ya uchumi wa dunia na kusisitiza kuwa ulikuwa mtikisiko huo ulioishawishi AU kuchagua mada ya Mkutano huo.
“Tuko katika zahama ya kweli kweli. Afrika inakabiliwa na matatizo makubwa ya kiuchumi, hali ambayo inaweka shinikizo kubwa katika bajeti za mataifa mbali mbali na kusababisha matatizo makubwa ya upungufu wa chakula,” amesema Ping na kuonya kuwa kama nchi za Afrika hazitakua hatua za haraka kujitosheleza kwa chakula, Afrika haiwezi kuwa na amani na utulivu.
“Chakuka ndilo mahitaji ya msingi kabisa na moyo wa maisha ya binadamu. Bila chakula, Bara letu haliwezi kuwa na amani na utulivu.”
Naye Dk. Migiro pia amezungumzia hali inayoanza kujitokeza tena ya mapinduzi ya kijeshi katika Afrika kwa sura nyingine na pia kutumia muda mwingi kuzungumzia umuhimu wa Afrika kujisheleza kwa chakula.
Rais Lula da Silva amesisitiza uhusiano wa karne nyingi kati ya Afrika na Brazil na jinsi utawala wake ulivyochukua hatua za dhahiri kuimarisha uhusiano huo.
“Kiasi cha wananchi wa Brazil milioni 76 wana asili yao katika Afrika ikiwa ni matokeo ya biashara haramu ya utumwa. Wengine milioni 10 wana asili ya Kiarabu. Binafsi nimetembelea Afrika mara 10 na kutua katika nchi 20,” amesema kiongozi huyo na kuongeza:
“Tunafanya juhudi kubwa kuimarisha uhusiano wetu na Afrika. Tumechangia kilimo cha Afrika kwa kuanzisha mashamba katika nchi nne za Afrika Magharibi zikiwamo Mali, Ghana na Benin…Tunaanzisha kiwanda cha dawa za kutuliza makali ya ukimwi katika Mozambique, na pia kuanzisha Chuo Kikuu chenye uwezo wa kuchukua wanafunzi 5,000 katika nchi hiyo ya Mozambique. Kwetu sisi Afrika ni bara kaka”
Rais Lula pia amewaomba viongozi wa Afrika kukataa mapinduzi ya kijeshi yaliyotokea katika nchi ya Honduras, na pia amewaomba waunge mkono jitihada za mji wa Rio de Janeiro wa nchi hiyo kuteuliwa kuwa mwenyeji wa Michezo ya Olimpiki ya mwaka 2016.
Naye kiongozi wa wafalme wa jadi, Profesa Nyebela amesema kuwa yeye na ujumbe wake wamealikwa kuhudhuria mkutano huo na Rais Gaddaffi, baada ya viongozi hao kuwa wamemtawaza kiongozi huyo wa Libya kuwa Mfalme wa Wafalme wa Afrika.
“Tunawakilisha, katika mkutano huu, wafalme wote, masultan wote, watoto na koo za kifalme pamoja na machifu wote wa Afrika,” amesema profesa huyo kutoka Ghana katika hotuba iliyovutia zaidi vicheko na kejeli kutoka kwa baadhi ya waliohudhuria sherehe za ufunguzi wa Mkutano huo.
.JPG)
